Bermedia.id – Paling demen kalo udah masuk nyeng namanya bulan Rowah. Entuh bocah tau aja siapa nyeng nih ari mo sedekah rowahan. Tiker pandan baru aja kelar digelar entuh bocah udah pada berebut sila nyari tempat nyeng rada deketan ama amil.
Tradisi rowahan kata orang tua dulu katanya sedekah atawa selametan mapag arwah nyeng pada pulang ke rumah menjelang bulan puasa. Mangkanya suguhannye ge umumnya nyeng entuh arwah doyanin dulu waktu entuh dia masing pada idup. Tapi biasanya kedoyanan mah uman buat syarat doang kalo masakan khas rowahan mah kudu ada.
Sayur pucung, sayur kembili ama sambelan plus ikan asin pake terigu entuh nyeng kudu ada. Itu mah menu andelan dalam sedekahkan khas betawi pinggiran pas ngadain sedekahan rowahan. Kalo nyeng ngadain tradisi rowahan rada adaan biasanya suka nambain ama bekakak ayam barang 3 ekor. Suguhinnye deket ama pedupaan. Entuh bekakak alias ayam panggang pada manting ngerungkag kena siram ama bumbu kecap.
Bocah pada demen sila deket amil lantaran entuh makanan suguan pada ngumpulnya di situ. Entuh bocah orang pada baca doa eh dia pada bebisik aja bari ngiatin bekakak nyeng baunya ngitikin idung. Kaga berasa entuh bocah pada ngeces ilernya ngiatan bekakak ayam nyeng begitu menggoda kiatan nya.
Amil baru aja kelar baca doa entuh bocah udah pada berebut bekakak ayam. Untung amil keburu misain barang atu. Buat dibrengkos, buat berkatlah. Kalo kaga begitu abis entuh bekakak di grebeg ama bocah.
Saking serunya entuh kecap nyeng jadi bumbu bekakak pada ewer-eweran di tiker.
Lah nyeng punya rumah ngiat bocah pada berebut bekakak ampe tiker pada blepotan kecap ge. Kaga ada nyeng marah malah pada resep ngiatnya biar berkah katanya.
Ikut agama
Tradisi rowahan zaman sekarang mah udah agak beda. Beberapa bagian yang sekirenye gak boleh same agama, udeh gak ada lagi. Orang kate ngadain tradisi rowahan buat bersyukur, jadi caranya juga mesti bener. Semue kudu ikut aturan agama. Jangan sampe niat mau bersyukur jatohnya malah kufur. Yah repot. Rugi dua kali jadinya.