Bermedia.id – Satu lagi neh saye kenalin sambelan atawa bucak-bacek, makanan khas Betawi pinggir yang sekarang rasa-rasanya udeh mulai dilupain orang.
Sambelan enih bukan sambel biase kaya nyeng dari cabe. Ini mah tibang namanya doang sambelan. Tapi isinya mah sayuran. Ada toge, pare, kacang panjang, timun, lengkiyo ama ikan asin.
Nah ikan asinnya biasaya nyeng rada macem-macem. Karena ada juga nyeng pake ikan tembang, ada nyang jaketan (alias tepung terigu), ama ikan perek berbungkus terigu juga. Terus ada nyeng rada mahal pake ikan gabus kering.
Menu sambelan atawa bucak-bacek biasanya kudu ada di besek selametan malem lebaran. Menu ini biasanya buat pelengkap timpalan isi nyorog. Isinya bareng ikan kebo ama sayur kembili. Itu tuh kentang disayur santen. Nyang ntu juga termasuk masakan kedemenan enyak-enyak.
Makannya biasanya kaga pake nasi alias. Kalo pake nasi rada kurang manteb. Begitu kata nyeng udah keranjingan makan gituan mah.
Mirip Pecel
Kalo sepintas ngeliat mah kaya pecel. Tapi pecel pake bumbu. Lah dia mah kaga. Tibang begitu aja.
Kalo pecel segala sayurannya pake ngukus. Kalo nyeng eni sambelan mah cuma maen ongseng atawa tumis jadi. Udah kula ama bumbu.
Sambelan kudu buru dimakan. Karena kalo rada telat makanya bisa jadi basi. Makan sambelan masaknya rada pedes. Buseh entuh keringet ampe ngucur saking sumbrahnya.
Tapi sayangnya keberadaan sambelan ini udah langka. Udah jarang orang tengok. Padahal mah bikinnye gampang pisan. Tibang sayuran ditumis, kasih cabe sama ikan asin.
Orang mpuan zaman sekarang mah agak ribet kali bikin sambelan beginian. Gak nendang katanya. Gak bisa buat majang di medsos. Orang kate dah.
Padahal ini pan menu warisan orang tua kite. Kalo bukan kite nyang jagain, siapa lagi. Lah emang mau orang dari bangsa laen yang lestariin makanan begini. Mestinye mah kita kendiri yang lestariin. Walaupun sekarang banyak menu makanan yang baru ya menu makanan warisan jangan lupain.
Ya kali kalo tiap ari masak beginian mah bosen. Seenggaknya ada deh sehari dari setaon mah orang rumah jajal nyobain menu ginian. Itung-itung nostalgia zaman baheula. Gitu bukan?!
