Bermedia.id – Dulu nyeng namanya tukang minyak kelapa pada ngider keliling kampung. Si abang mikul entuh minyak kelapa di kaleng gede. Baju abang jualan minyak kelapa biasanya necis. Jualannya pake kemaja, celana cutbray sama topi bambu buat ngalingin panas sama ujan.
Belinya boleh literan. Tapi banyakan mah enyak kita belinyanya cantigan. Kalo udah literan biasanya buat ada acara besar. Acara nyeng butuh minyak goreng banyak buat masak. Kalo buat masak seari-ari mah paling belinya cantingan.
Entuh minyak cantingan dimasukin di bekas botol limun. Lah beli secanting ge dulu mah awet. Karena orang dulu mah jarang ama nyeng namanya masak atawa goreng. Banyakan pada ngegarang, bakar, kukus ama mepes dah. Mangkanya awaknya pada sehat dan kuat-kuat.
Minyak kelape zaman dulu mah terbilang aman. Kite gak berani bilang sehat deh yeh, biar gimane semua minyak mengandung lemak. Dan yang namenye lemak biasanye bahaya. Kudu ati-ati.
Minyak kelapa zaman dulu terbilang aman lantaran buatnye pake bahan alami semua. Bahan dasarnya ya daging kelapa yang udah tua. Jemur sampe jadi kopra. Jemurnya tergantung cuaca itu hari. Kalo musim panas, jemurnya bisa cepet. Lah kalo musim ujan jemurnya agak repot. Butuh berhari-hari buat ngolah kelapa biar jadi kopra yang siap pake.
Abis ntu, parut kopra sampe jadi santen. Kalo udah jadi santen masak dah di kuali gede. Masaknya di atas tungku kayu.
Cara Bikin
Bikin minyak kelapa gampang-gampang ribet. Emang keliatannye gampang. Tapi kalo ngejalaninnye belum tentu semua orang bisa. Proses bikin minyak ini juga gak bisa sembarangan. Ada kepercayaan orang tua dulu, kalo kita mau bikin minyak kelapa, selama ngaduk santen sampe jadi minyak kelapa, kite ga boleh ngomong. Katenye kalo kita ngomong sedikit ajeh, tuh santen ngambul, gak mau jadi minyak. Lah, pan repot itu.
Entuh tukang minyak ngiderin kampung bawa kaleng minyak pake dipikul. bari teregeng-regeng ge dilakonin. Mana nyeng beli rada langka, mana ari pas ujan, jalanan masing belon ada aspal, nyeblok dah entuh ampe tukang minyak.
Celana cutbray digulung ampe sedengkul takut belopot ama tanah ladon. Tudung tiker ampe lepek kena aer ujan. Semua tetep aja dijalanin. Entuh tukang minyak kaga nyerah maranin rejeki buat anak bini.
